அருள்மிகு ஏகாம்பரேஸ்வரர் திருக்கோயில்

ராகுகால பூஜை முதன்முதலாக ஆரம்பிக்கப்பெற்ற பெருமை இந்த கோயிலைத்தான் சாரும். சிவன் கோயிலாக இருந்தாலும் இங்கிருக்கும் காளிகா பரமேஸ்வரி சன்னதியிலேயே கூட்டம் அலைமோதுகிறது. ராஜகணபதியை  வணங்கிவிட்டு ராகு காலத்தில் காளிகா பரமேஸ்வரிக்கு பூஜை செய்ய வேண்டும். அசுரனை வதம் செய்யும் கோலத்தில் எட்டு கரங்களுடன்  அஷ்டபுஜ காளியாக கன்னிகாபரமேஸ்வரி வீற்றிருக்கிறாள். கத்தி, கேடயம் ஆகியவை கைகளில் உள்ளன. காளிகா பரமேஸ்வரியின் சன்னதி  முன்பு அஷ்டலட்சுமி மண்டபம் இருக்கிறது. அம்பாள் ருத்திராம்சம் பொருந்தியவள் என்பதால் நந்தி சிலை அமைக்கப்பட்டுள்ளது குறிப்பி டத்தக்கது. விஸ்வகர்ம சமுதாய மக்களின் பராமரிப்பில் இக்கோவில் இருக்கிறது.

விஸ்வகர்ம சமுதாய மக்களால் இக்கோவில் உருவாக்கப்பட்டதாக கருதப்படுகிறது. ஸ்தபதிகளின் குலதெய்வம் காமாட்சி. அவர்கள்  ஒரு கோவில்கட்டுமான பணியை ஆரம்பிக்கும்போது காளி படத்தை வரைந்தேஆரம்பிப்பார்கள். அனேகமாக கும்பகோணத்தில் உள்ள கோயி ல்களை கட்ட துவங்கும்போது காளியை பிரதிஷ்டை செய்துவிட்டு இப்பணியை தொடங்கியிருக்கலாம் என தெரிகிறது. இந்தக்கோயிலில்  ஏகாம்பரேஸ்வரரையும் தங்கள் குலதெய்வமான காமாட்சியையும் பிரதிஷ்டைசெய்தனர். இங்கு ஏகாம்பரேஸ்வரரைவிட காமாட்சிக்கே அதிக மரியாதை. எனவே காமாட்சி மட்டுமே இங்கிருந்து மகாமக குளத்திற்கு எழுந்தருள்வாள்.